Professor  halerik!!
                     M.E : Professor Bosok.

“hau halo sintina sai hau nia hela fatin”

“professor ne’e bosok dalaruma nia moras mental” lia fuan ne’ebé ita la hanoin hetan maibé ukun nain hanoin hetan ida ne’e hodi hato’o ba nia povu ne’ebé halerik.

Tuir lolos hau labele hela iha fatin ne’e, nudar edukador la merese hau atu hela, maibe husik bá, tanba hau hadomi ita nia rain no oan sira atu sai matenek.

Nudar mákina estadu, hakruk ba lei no ordem ne’ebé  iha “prontu atu muda ba iha terrotoriu laran tomak”.

Sintina ne'ebe halo ba hela fatin
 foto : Scos Vieira.

Professor ida husi postu administrativu Uatulari, Munisipiu Viqueque hakruk ba lei Komissaun Funsaun Públika nian hodi ba iha rai ne’ebé haketak an husi Munuisipiu hotu-hotu (Atauro). Edukador ho nia naran kompletu Luis da Cruz Silva ne’e muda husi nia moris fatin Uatulari Viqueque, iha tinan 2002 wainhira Timor-Leste kore an husi Indonezia nia ukun.

wainhira ain sama iha rai ki’ik ne’e, hela iha uma mestri sira nian ne’ebé mak Governu Indonezia husik mai timoroan sira, uma ne’e mos nia fundasaun hahu dodok no monu ba dadauk, udan been turuk habokon isin tanba kalen kuak husi sorin ba sorin. Tinan sanulu hamahan an deit iha uma ne’ebé nia kakuluk kuak ba mai, kalan toba iha uma laran, hateke kalen kuak hodi sura fitun sira iha lalehan.

wainhira rai nakdoko, dalan uniku atu salva moris mak halai sai husi uma laran. Tauk kahur ho triste sai ida deit. Uma ne’ebé professor sira hela mós oras ne’e nia fundasaun rahun husi sorin ba sorin

“maun sira haré deit ba, uma ne’e nia fondasi monu hotu ona, rai nakdoko ne’e halo hau halai sai, tanba tauk uma monu hanehan” hateten Warikoan ne’e hodi hatudu uma nia kondisaun at ba jornalista sira.

professor hateke hela ba residensia professor nian ne'ebe mak nia kondisaun aat ona. 
foto : Scos Vieira.

La iha tan dalan seluk atu hili. Hanesan ema kaer manu aman ida husi fatin ida no husik iha fatin seluk ne’ebé nunka hatene dalan. La iha familia ida, sá tan rai pedasuk ida atu halo ai-mahon hodi hela. Ho situasaun ne’e hotu. iha tinan 2012, professor ne’e tenki muda nia hela fatin be nia fundasaun hahu dodok ba dadaun  ne’e, hodi ba hadia sintina antigu ida hodi hela ba. tanba senti la seguru.

Professor ne’e tenki hadia sintina ne’ebé ema la uja ona hodi sai hela fatin atu nune’e bele fahe nia matenek ba estudantes sira. Sintina ne’ebé nakfila ba hela fatin ne’e, iha sala han fatin, toba fatin ida, no mos fatin ba estuda.

Situasaun real ne’e nudar sasidik ida makas liu laloran nia siak ne’ebé hakilar iha tasi Atauro nian,  maibé edukador ne’e nunka foti pasu ida ba kotuk. tuba rai metin nafatin hodi hanorin.

“uma ida hau hela dadauk ne’e, uluk sintina, maibé tanba uma nia kondisaun la diak entaun hau mai hadia hodi hela deit” dehan Luis hodi hakruk ba rai.

Molok ne’e, iha tinan 2007, Governo anterior, Ministériu Edukasaun foti ona dadus no promete ba professor ne’e atu hadia hela fatin “Governu nia planu ne’e midar deit iha ibun tutun maibé la akontese ida " dehan nia ho mataween nakonu.

Edukador ne’e, husu ho halerik ba Ministériu Edukasaun atu haré ba realidade ne’e, hodi hamenus netik realidade ne’ebé nudar naha todan iha kabás, maibé Governo nudar aman ba nasaun ne’e mos la fiar halerik hirak ne’e.

Husu ho haraik an, maibé governante dehan professor sira moras mental.

“2002 ami sidauk koloka professor sira, ne’e nia bosok, hau hetene ona katak nia lá’os ema diak, ami koloka professor ba iha Atauro ne’e iha 2007, maibé la buat ida ami sei verifika dadus” dehan Diretor Geral Assuntos Políticas No Parceria Ministerio Educação Antoninho Pires.

Sorin seluk, Director Organizasaun la Governamental, Lalenok Ba Ema Hotu LABEH, Christopher Henry Samsong, kritika Ministério Edukasaun ne’ebé mak la iha kapasidade atu rezolve ba kestaun ne’e, maske iha tinan naruk nia laran.

Professor dalaruma sente preokupadu ba nie hela fatin wainhira tempu udan, tanba isin hanorin maibe kakutak hanoin hela nia uma ne’ebé atu monu.

Edukasaun nudar janela mundu nian atu loke hodi deskobre mundu nia segredu.

Ohin loron sai ukun nain tanba Mestri.

Hakerek Nain : Constancio Vieira.