Parte II, HAMOUTH A’AN IHA  HAKMATEK NIA LARAN.

Agus hatan Nora hafoin tinan 5.

Lia fua ne’ebé Agus hato’o ba Nora wainhira hetan sucesso.

foto ilustrasaun. : Hakuak morna.

Agus rai nafatin lia fuan Nora nian ne’ebé hatun Agus, lia fuan hafera fuan maibe Agus rai metin iha fuan hun.

Wainhira  Agus fila husi servisu fatin; nia servisu lalin sasan iha loja ida “Nora dehan hau la eskola ne’e loos” Agus koko halo refleksaun badak ba nia aan, wainhira toba iha nia kuartu laran.

Osan ne’ebé nia hetan husi nia servisu todan ne’e mos oituan deit, tanba loja nain sira aplika salariu mínimu $115, maske oituan maibe ne’e to’o ona ba Agus atu hatutan moris.

Wainhira Agus simu osan “osan ne’e hau tenki rai balun atu nune’e hau bele ba tau naran wainhira universidade simu estudante foun”  dehan Agus hodi hateke ba osan.

Husi ne’e, Agus rai ona osan, maibe nia la rai ba kaixa depojitu hanesan ema seluk, nia rai deit iha kaixa mamuk supermi nian ne’ebé rai hela iha nia kuartu laran.

Loron troka ba semana, fulan ba tinan universidade hahu fo sai ona avizu hodi fo hatene ba publiku ne’ebé hakarak hasaé nia nivel eduksaun; iha momentu ne’e  “patraun, hau bele husu lisensa loron ida deit ga lae? Tanba hau iha problema atu rejolve” Agus husu haraik aan ba loja nain “bele Agus, maibe tenki tama fali para ita haloot sasan tanba sasan barak mai husi rai liur” loja nain fo hanoin nafatin ba Agus “obrigadu barak maun” Agus hatan ho oin midar hodi lao husik loja.

            Agus hahu foti ona nia osan no dokumentus ne’ebé antes ne’e nia rai hela iha nia pasta kikoan ne’ebé nia tara hela iha didin lolon.

Dader san nakukun, mahoween sei habokon aitahan, rai sei hakmatek tebes, Agus hahu hader ona husi toba fatin hodi lori dokumentus ba tau naran iha universidade.

“Alin hein deit aviju depois mai tuir teste” resepsionista fo hatene ba Agus no lolo resibu hafoin tau naran “diak mana” Agus hatan no haraik nia hamnasa mihis hodi hakat ain husik kampus.

            Servisu to’o fulan ida ho balun nia laran, Agus haré fila fali ba resibu ne’ebé universidade fo ne’e “aii aban hau tuir ona teste” Agus hakfofak wainhira haré surat tahan ne’e.

Wainhira teste hotu, ema hahu ba haré nia naran, Agus mos ba uma hodi ba haré rejultadu , Agus nia matan halai ba mai iha surart mutin ne’ebé nakonu deit ho estudantes ne’ebé liu teste nia naran, “Obrigado Maromak” Agus agradese tanba nia naran sai.

            Husi ne’e Agus hahu hanoin, nia atu hili servisu ka hili eskola, maibe karik nia hili servisu deit, nia sei la eskola, no eskola deit nia sei la hetan osan, iha minuutu balun nia laran, hanoin mosu husi Agus nia kakutak, nia tenki eskola kalan no loron nia tenki ba servisu hodi selu ba nia propinas.

Agus lori tui-tuir nia roupa no livru eskola nian iha pasta, tanba sai husi servisu kalan boot nia tenki kontinua kedan ho nia estudu.

Nia hili departamentu komunikasaun sosial, Agus estuda makas la depende deit ba dosente sira, hanesan uluk nia fo hatene ba eis namorada Nora (Nora feto ida ne’ebé mak Agus hadomi tebes, maibe tan dehan Agus la eskola entaun sira nia domin tenki para provisorio ).

Agus hili komunikasaun sosial tanba Agus buka referensia barak katak, eskola komuniakasaun mak bele hatutan komunidade nia lian ba Nain ulun sira nia tilun, uja eskola nudar meio ida atu nia komunika ho ema ho maneira ne’ebé diak.

Agus hahu eskola iha universidade, maibe  Nora nia kolega balun eskola ho Agus iha departamentu ida, sira fo hatene ba Nora, katak Agus agora eskola hela, no nia mos ema ida ne’ebé iha vontade duni atu aprende.

Loron ida “Maun Nora nia doben ga lae??” Nora nia kolega husu ba Agus “ema hanesan Nora, ohin loron hau sidauk merese ba nia, tanba nia eskola boot ona ne’e...maibe hau fiar, aban bainrua hau mak sei kaer metin nia liman hodi hasoru laloran moris” Agus hatan hodi fo esperansa ba Nora nia kolega.

            Durante Agus eskola nunka hatudu nia aan ba Nora katak nia eskola ona iha universidade ida, Agus helik deit, maibe nia promete loron ida nia sei hatudu aan ba Nora katak nia mos susesu ona.

Lia fuan moruk be uluk Nora haraik ba nia, Agus sente hanesan lalelonok ba nia atu leno aan hodi hatene nia realidade rasik hodi esforsu nia aan.

Eskola hasoru sasidik oioin maibe la satan nia dalan atu aprende, Agus nia objetivu mak tenki hatudu nia aan ba ema seluk katak nia mos susesu, nia hakmatek iha fatin maske ema kolia aat nia, husik nia aksaun susesu mak responde ba ema sira ne’ebé hatun nia.

Hafoin tinan lima, Agus resjista nia naran hodi tuir graduasaun, Agus ne’ebé mak uluk Nora hatun dehan la eskola, kakutak delek, ohin loron sai oin seluk tanba hafutar ona hena metan iha nia isin lolon, hautudu, Agus nia luta iha tinan lima nia laran hodi hetan sertifikadu basarelatu (s1) remata ona; molok nia simu graduasaun, nia fo ona surat ida ba Nora liu husi Nora nia kolega “Nora, karik o haluha ona hau, durante tinan lima nia laran ita la hasé malu, maibe iha biban ida ne’e hau hakarak ita boot mai hasoru hau iha salaun Ex Mercado dader tuku 08:00, hein katak, Nora sei hiit aan mai hasoru hau ” konteudu husi surat ne’e la klaru, maibe Agus hakarak duni hakerek hanesan ne’e atu nune’e fo surpreja ba Nora.

Nora nia fuan nafunan, basá ema ne’ebé  hamouth aan iha hakmatek nia laran durante tinan lima mosu teki-teki iha nia mehi real; Nora hahu latan nia isin iha dukur nia ukun “Agus nia surat ne’e la klaru, maibe nia dehan hau ba hasoru, hau tenki ba, tanba ne’e Agus mak konvida” Nora hanoin iha laran.

Teki-teki rai naroman lori Nora ba fatin ne’ebé horseik Agus promete, maibe oras hatudu ona ba tuku 09:00, Nora nia matan fihir ba Ex merkadu laran hakonu deit ho ema sira ne’ebé hatais hena metan, halo Nora konfunde liu tan, nia koko kontaktu maibe Agus nia telefone mate hela.

Nora sadere aan ba parede iha iha Ex merkadu laran hodi hateke ba mai, tan deit buka Agus, maibe nia nafatin la hetan tanba ema sura la nahas.

“Agus dos Santos, lisensiadu iha departamentu komunikasaun sosial” teki-teki anin suut lori naran ne’e hasé Nora nia tilun “Naran ne’e hau hatene, ida ne’e Agus nia naran kompletu, nia mos tuir graduasaun hotu ga?” Nora hanoin iha laran no konfunde.

Nora foti matan hodi baku ba Reitor no dosente sira nia oin hodi haré ba joven isin lotuk ne’ebé hafutar hena metan iha isin loron hakruk hela ba reitor atu muda xapeu nia talin, nia mak Agus ne’ebé uluk Nora hatun tan deit la eskola.

Nora hahu dada aan hodi ba hein Agus iha odamatan boot molok seremonia ne’e to’o rohan, Agus mos hahu buka ona feto ne’ebé uluk hatun nian ne’e maibe  la hetan tanba hein ona iha portaun, Agus hakat sai ain husi Ex merkadu nia laran derepente Nora satan nia dalan “parabens no parabens Agus...maibe hau husu deskulpa barak hakonu ho ita boot nia fuan, ba hau nia lia fuan ne’ebé uluk soke ita boot nia fuan” dehan Nora hodi kaer Agus nia liman “Nora obrigado barak;  hau perdua ona, molok lia fuan deskulpa monu husi  ita boot  nia ibun,  o nia lia fuan moruk  ne’ebé uluk o hato’o mak ohin loron hau sai ona Agus lolos (SUSESU), antes ne’e hau fuan moras, maibe hau refleta aan,  hau konsiente, konsidera lia fuan ne’ebé o hato’o nudar motivasaun ba hau”  hatan Agus hodi hateke ba Nora nia matan laran.

“hau bele hakuak o ga lae” Nora husu “Bele deit tanba hau O nian, ohin loron no ba futuru” hatan Agus ba Nora hodi fo rein ba Nora nia rentos, husi ne’e Agus ho Nora hatutan fali sira nia domin ne’ebé mak kotu durante tinan lima nia laran. Hein sira nia domin sei buras ba bebeik.

Lalika hatan o nia lia fuan ba ema nia lia fuan ne’ebé hatun O, maibe rai metin iha fuan nia hun,  hakat ba oin, husik o nia aksaun mak hatan ema nia lia fuan.

Hakerek Nain : Constancio dos Santos Vieira.