HAMOUTH A’AN IHA  HAKMATEK NIA LARAN.

“O tenki tuir hau, hau mak tenki hili universidade mak o eskola ba, se lae hau la apoia”

“ Universidade hotu-hotu diak, naran katak ita mak estuda” konversa badak no simples husi Nora ho Agus liu husi telefone.

Nora nudar estudante ida ne’ebé eskola iha universidade famozu ida iha Díli, besik atu remata nia estudo, tanba tama ona ba teoria livre no Agus mane ida ne’ebé remata deit nia estudo iha nivel Sekundário.

Nora sempre ejije Agus hodi kontinua nia estudu iha eskola nivel aas (Universidade), maibe Agus mai husi familia ne’ebé nia ekonomia fraku tebes, maske nune’e nia esforsu hodi  halao nia servisu nudar traballador iha empreja ida iha kapital Díli, Agus hakarak eskola maibe la iha osan hodi selu propinas.

Iha Agus nia servisu loro-loron nian, nia kesi domin ho feto  klosan ida ne’ebé isin lotuk, fuuk badak too deit iha kabás, morena no ain as 165 cm, tinan 26, nia naran Nora.

Domin nia dikin hahu nani no buras, tanba sira rua rega deit ho lia fuan murak no pasensia, maske hasoru sasidik oioin, Nora ho Agus tuba no halao nafatin sira nia domin no konsege tinan ida liu.

“Doben hau hakarak eskola duni maibe osan sidauk to’o” Agus sempre konta realidade ne’ebé nia hasoru ba nia murak rai Nora, tanba Nora sempre obriga Agus atu eskola iha unversidade.

“Eskola ne’e diak hela xaaaa, la dun gasta osan ida” Nora hatan hodi motiva Agus nudar nia doben.

Maske Agus nafatin kolia nia realidade moris, maibe Nora la preokupa no nia hakarak Agus tenki eskola iha universidade.

Nora lakohi rona Agus nia lia fuan maske esplika neneik ba nia, Nora nafatin lakohi rona tanba nia dehan nia deit mak hatene kona ba eskola nia lalaok.

 “Nor...wainhira haruka hau eskola ne’e bele fo hanoin, ho lian mamar, lalika lori o nia maneirra hatun hau hanesan ne’e” hateten Agus ba Nora ho lia be neneik wainhira Agus rona Nora nia lian hahu makas iha telefone hodi hatun nia.

“karik hau la eskola konserteja Nora moe tanba hela tinan ida nora eskola hotu ona no nia atu tau xapeu metan (toga hitam), maibe halao domin ho ema ne’ebé nivel edukasaun kiik hanesan hau” Agus nia hanoin iha laran.

“universidade hotu-hotu la diak, só universidade ida deit mak diak maka universidade ne’ebé hau eskola bá” dehan Nora ho lian makas maske nia doben sidauk katak buat ida.

“Eskola hotu-hotu diak naran katak ita tenki estuda, lê barak lalika hein deit dosente sira” hatan Agus ho lian neneik.

“Agus eskola ida hau eskola ba ne’e halo ami matenek, o mos tenki eskola par matenek hanesan hau” Nora dehan tan hodi hatudu aan ituan ba Agus.

Maske Nora hatudu aan dehan matenek maibe rejultadu eskola la hanesan ho buat ne’ebé mak nia kolia bele dehan babain deit.

Nora tenki ejiji Agus tanba Nora nia kolega sira nafatin fo hanoin ”o eskola boot mos bele ba foti fali ema ida hanesan Agus ne’e, eskola kiik tan, o la moe ka?”

Lia fuan ne’e mak Nora rai iha nia kakutak hodi obriga nafatin Agus hodi eskola.

Nora lori nia eskola ne’ebé besik hotu dadauk ne’e hodi sadik ba Agus, maibe Agus kolia mamar nafatin maske fuan ne’e atu nakfera.

Agus sente lia fuan ne’ebé Nora hato’o hakat ona nia pasensia “nusa o tenki halo aan! Lori o nia eskola boot hodi hatun hau nudar onia doben” heteten Agus ho lian be triste no makas hodi hamate telefone iha liman.

Nora telefone fila-fila maibe Agus lakohi simu ona tan deit lia fuan “tinan rua mai tan ema sei la presija ema eskola kiik, presija deit mak eskola boot hanesan ami ne’e” dehan Nora ba Agus.

Agus la simu nafatin telefone no rai nia telefone iha kama ulun “o hirus ne’e urusan, o eskola ka la eskola ne’e URKEKE” lia fuan ne’e mak Nora manda ba Agus liu husi mensagen wainhira Agus hare nia ekran (layar) telefone nian.

Agus hare no hanoin lia fuan ne’e ho mataween nakonu iha nia matan fuan no la hatan lia fuan ne’ebé Nora manda ba nia.

Agus obriga nia aan tenki toba tanba oras hatudu ona ba numeru 23:47, kalan ne’ebé ema seluk sente furak ne’e moruk ba Agus nia toba.

Agus koko hahu taka neneik nia matan maske fuan ne’e moras hanesa daun rihun ida ne’eb’e sona neneik.

Molok Agus toba “la buat ida Nor...diak liu hadok aan husi hau, tanba hau hatene o nia maneira ne’e la simu ema eskola kiik hanesan hau, lalika simu ema hanesan hau, hau la eskola aban bain rua hamoe o nia familia tomak” nia koko manda lia fuan liu husi (Watsaap) maibe lia fuan ne’e la hetan resposta husi Nora.

Agus hahu taka ona nia matan hodi la hare mundu nia furak maibé lia fuan moruk ne’ebé ohin Nora hato’o ba nia la lakon husi nia neon.

“kokorekoooo....kokorekooo.....” manu hahu fanun emar hotu husi nia toba fatin, Agus hahu hader, sente isin todan maibe obriga nia aan tenki hader husi toba fatin hodi ba servisu hanesan ema traballador.

Nia foti telefone no koko loke (watsaap) “okkk semoga hau hetan mane ne’ebé eskola boot iha futuru” lia fuan ne’e mak Nora hatan ba Agus nia lia fuan ne’ebé manda hori kalan.

“Afinal hori kalan ne’e Nora nia maneira ida oinsa atu husik hau tan deit hau eskola kiik ” Agus hanoin iha laran wainhira le’e hotu lia fuan ne’ebé Nora manda ba nia liu husi WP.

Iha loron ne’e kedan Agus ho laran todan hamoos Nora nia número telefone ne’ebé hakerek (DEAR NORA), maske liman toos maibé tenki hamoos atu nune’e labele hanoin nafatin Nora nia prejensa no lalatak.

Agus la iha lia fuan, nia monok lia fuan rihun ba rihun, no hahu halao nia servisu hanesan traballador, Nora nia lalatak habosok nafatin Agus, maibe nia konsiente katak ema hanesan nia aan la merese ba Nora ne’ebé buka deit eskola boot.

Molok fahe malu ne’e mosu iha sira rua nia leet, Agus istima no kuidadu nora hanesan ai funan buras ida iha Agus nia jardim domin, Nora maña ba Agus, han no hemu hamutuk iha fatin no tempu ne’ebé sira sente livre, sira mos sempre goja malu ho istima malu.

Aiknanoik midar ne’e nakfila sai moruk, istoria furak ne’ebé sira hamosu iha tinan ida nia laran, nahas iha minutu balun nia laran hanesan maho-ween maran, tan loron hanas.

            Nora ho Agus nia domin mouth ona iha dalan klaran, la too rohan, planu hotu-hotu nabén no suar lakon husi sira nia haré, feto isin lotuk ne’e mos la liga ona mane (Agus) ne’ebé uluk istima no kuidadu nia.

“Ohin loron Agus la vale, maibé loron aban nia sei vale ba ema hotu nia matan, hau la lakon vontade, hau tenki eskola no estuda barak, ema ne’ebé eskola hotu uluk la signifika nia susesu, maibe ema ne’ebé susesu mak ema ne’ebé hetan dezafio oioin maibe la satan nia hakat” Agus hanoin iha laran.

Hakat ba oin hodi husik loron ohin, ain tanen sama luron loron aban nian, hakoi historia furak no moruak ne’ebé ita hakur hamutuk.

Lian ai-tarak sona hau tilun, borus hau fuan, la iha lia fuan be monu iha hau ibun hodi hatan.

Nora nia egoista troka deit ho arepende wainhira Agus hamouth aan iha hakmatek nia laran hodi hein loron aban be hakonu ho mehi foun.

Hakerek husi : Constancio D.S. Vieira. (Scos Vieira)/ 16/09/16//