KOSAR WEEN HAMATAK MORIS.

Foto |: Aniceto Dos Reis

"sosa.....sosa.." lian ne’e sai husi mane Isin moreno nia ibun. Nia obriga an hodi hakilar makas maske lian la sai bokar. Matan hare nia uat sai makas iha nia kakorok nia kulit ne’ebé hahu namkurut ne’e. Xapeu tuan homan ho ai-kadiru tahan iha nia ulun, hodi satan netik loron nia manas. Faru mutin ne’ebé hatais, nia kór hahu malahuk no nakonu ho malus nia been mean.

Kalsa metan ne’ebé fuk mutin ne’e hatais mós nakonu deit ho rai rahun. Aileba halo kabas namkurut, sai kaluk. Ain be nia kbiit hahu nanotak ne’e mós la baruk hodi foti hakat. Estrada manas hanas nia ain tanen, la hakotu nia vontade. Rai rahun kahur ho loron matan dalaruma satan nia matan ne’ebé mak hahu malahuk ona ne’e, maibé lia fuan baruk hanesan lia fuan moruk no lulik ba nia atu temi. Nia nafatin temi "hau faan, tanba oan sira presija " lia fuan ne’e mak midar ba sira.

 Hakilar husi bairo ida ba bairo seluk, sira nia hakilar ne’e halerik ba osan nain sira atu sosa netik sasan ne’ebé nia leba. "oan nia futuru importante" lia fuan ne’e mak nia hedi iha nia fuan hun, nudar kbiit ida ba nia hodi funu hasoru tempu nia siak. Hena tuan kiik malahuk be nia kahe,  hena ne’e mak nia hamoos netik kosar ween be sulin iha nia hasan. Hamlaha no hamrok la biban atu kore nia vontade. Masa tuan ne’ebe nia haklili nakonu ho bee matak, Bee matak ne’e nia kuru iha be matan, iha Dare. Duit metan ne’ebé nia hetan iha loron ida, nia falun iha plastiku kor metan "ida ne’e hau rai didiak, karik oan sira presija ba eskola hau fó" dehan katuas ne’e hodi sena plastiku metan ba kohe tuan neebe nia tara.

Nia sadere an ba aihun iha Tasi Ibun tanba kolen. ain ne’ebé nia uat hahu mamar ne’e mós la iha ona kbiit hodi foti hakat. Liman hahu dulas ona masa tuan ne’ebé  be matak iha laran ne’e, ni hahu fui ba ibun. Hafoin habokon be matak ba nia kakorok, foti tan fehuk tunu rohan iha kohe tuan hodi tahan too lorokraik. "dader hau mai faan, hau tenki lori kedan Bee, no fehuk tunu, atu nune hau labele gasta tan osan ne’ebé hau hetan. tanba osan ne’e, ba oan nia eskola" Dehan tiu Jé hodi fó hamnasa midar.

"Hau diak hela" Lia fuan ne’e sempre mosu husi nia ibun bainhira oan sira husu aman nia kondisaun. aman Subar kolen, subar nia susar ba oan sira. Oan nunka hatene aman nia susar bainhira halao servisu ida.

Kosar ween ne’ebé turuk, sei haburas oan nia moris iha loron aban

Hakeren nain : Constâncio Dos santos Vieira.