“Hau Moras Ne’e Mak Haruka Oan Faan No...”

                “Hau Moras Ne’e Mak Haruka Oan Faan No...”

ADODY LORI HELA ETU FALUN HODI HEIN HELA SOSA NAIN SIRA IHA HOTEL TIMOR.

Labarik iha direito asesu ba edukausaun tuir konvesaun direitos humanos ba labarik

artigu 28 katak labarik sira iha direitu tomak atu asesu edukasaun ho livre.

Maske lei internasional kolia nune maibe ekonomia familia nebe’e difisil tebes 

obriga inan aman hruka nia oan tenki faan.

Realidade moris nebe’e difisil, motiva labarik tinan hitu ne’e la sente loron manas nebe sunu isin.

Loron manas la sai kestaun ba labarik ho naran estimadu Adody ne’e, maibe osan mak faktor determinante ba nia.

Etu falun ne’ebé tau iha nia fatin hodi leba haleu jardim nudar knaar ne’ebé labarik ne’e halo wanhira sai husi eskola.

“Maun sosa hau nia nasi bungkus lai, maun...maun...maun...” Adodi husu ho haraik aan ba ema sira nebe’e tun husi kareta hodi tama Hotel Timor.

Maske Adody husu ho haraik an maibe dalaruma ema balun la hatan labarik ne’e nia hakarak hodi lolo netik osan ruma atu troka ba nia etu falun.

“alin osan la iha...to’o ona eee alin faan deit” Adody ho oin triste wanhira rona lia fuan ne’e.

La iha xinelus oan ida mak satan labarik ne’e nia ain tanen, estrada nia manas ne’ebé hanas iha nia ain tanen la satan dalan ba labarik ne’e atu nafatin lori etu falun.

Aman nia kondisaun saúde nebe’e la permite atu halo servisu todan ida ne’e mak razaun ida hodi haruka nia oan tenki fa’an hodi hatutan nia moris.

“hau nia liman ne’e moras tinan barak ona, hau mos la hatene maibe kafuak mak iha laran, liman ne’e halo hau kaer servisu todan mos la diak, tanba ne’e hau haruka labarik sira fa’an par atu sosa sasan nebe’e sira presija” hateten Adodi nia aman hodi hatudu nia lima karuk nebe’e moras.

Inan aman nebe’e mak la hanoin nia oan rasik wainhira faan iha kapital, kareta no motor mos nadodon hanesan nehek mean halo linha, maibe ekonomia uma laran nebe’e fraku inan aman tenki haruka nia oan ba faan.

“hau tauk, kareta iha Díli mos barak, Adodi nia tinan sei kiik, maibe nia tenki faan” hatutan Adodi nia aman hodi hamosu oin be triste.

Labrik ne’ebé foin tur iha terseira klase ne’e tenki halo aktividade nee hodi hatutan nia moris no sosa sasan eskola nian, basaá inan aman nebe nudar mahan moris mos oras nee kbiit sidauk too atu manha labarik sira iha uma deit.

“hau nia oan ne’e foin terseira klase maibe nia tenki faan ga no, se nia la faan ami atu hetan osan husi nebe’e... ”

Mundu hadulas loron matan, la sente oras hatudu ona ba numero sanulu resin rua, oras ne’e, oras han nian, psensia Adody tenki han etu falun ne’ebé nia faan, atu nune satan netik adody nia kabun hodi kontinua faan nia etu falun.

Etu mutin ho ikan pedasuk ne’ebé falun, ai han ne’e simples tebes maibe Adody sente ida ne’e hahan ne’ebé perfeito los ba nia atu han.

Esforsu ne’e mak labarik ne’e halo hodi duni mehi ne’ebe’e hakarak tebes atu sai jogador.

Osan nebe’e nia hetan , tenki ba sosa sasan eskola nian no sasan treino.

Tuku hat, molok loron matan les kalohan, Adody tenki hader ona husi nia toba fatin nebe’e simples tebes, hodi ba kampu atu treino.

Adody hela iha uma nebe’e oferese husi Adody nia aman sarani, hela iha kolmera, hela tuir ema hodi luta hasoru laloran moris.

Hean rasik ita moris, hean ho kbiit tomak maske dalaruma todan, hein loron ida sei to’o buat sa mak ita hakarak.

Reportazem : Fregas Soares, Aniceto no Scos Vieira.